عشان انت مصرى لازم تعانى
وتفقد كرامتك بكل المعانى
وتحرق فى دمك سنين مش ثوانى
واوعى تصدق كلام الاغانى
بتاع الحضاره وكانى ومانى
ده كله هجايص مايدخل ودانى
عشان انت مصرى العذاب بيناديك
بتبدا فى يومك حاجات بترازيك
فى نومك فى قومك تعكنن عليك
تضايقك ولسه العماص فى عينيك
مافيش ميه تشطف صابونه فى ايديك
وجسمك ملزق وريحتك عاديك
فتلبس وتنزل وفيك اللى فيك
ورايح لشغلك حتحتاج مواصله
ادى المترو واقف وكهربته فاصله
وفى الميكروباص فى خناقه وحاصله
اوتوبيس فرامله عايزالها وصله
وتوك توك ده تايه ومحتاج لبوصله
بتوصل لشغلك بدم اتحرق
فى زحمه وكتمه وحر وعرق
رئيسك سايبلك كومه ورق
ده غير دمغه ضايعه وملف اتسرق
وفى كام مواطن عامللك قلق
بيشكى تقول له روح اندعق
وعركه وهوجه وشاى اندلق
ومخك خلاص من الصداع اتفلق
هترجع لبيتك ده لو كان فى بيت
هتوصل هتندم ياريتك ماجيت
مراتك بتصرخ خلاص استويت
عيالك بتطلب وهات كيت وكيت
تزعق تهاتى ياناس اتهريت
ولاحد سامعك مهما هاتيت
عشان انت مصرى وده للاسف
فلازم تاسى تعيش تتقرف
وكل الاساسى فى حياتك ترف
فتنسى الكرامه وتنسى الشرف
وتسرق وتنصب او تنحرف
ودمعك بيجرى وجرحك نزف
مش انت اللى مصرى؟؟؟ جتك القرف
قالت جوزى فل الفل
غصبن عن عين كل الكل
راكب فوقكم ومالوش حل
مهما حقدكو زاد او قل
قاعد حيوريكو الذل
قالت جوزى بصحه شديده
كل الامراض عنه بعيده
وحيحكمكم فتره جديده
واحنا حنفضل عيله سعيده
وانتو حتبقو على الحديده
قالت جوزى صحته بمب
رغم الشعب ولاد الكلب
حتى ولو مكروه من القلب
لا يهمنا كرهكو ولا حب
عايزين نحكم مش نتحب
قالت جوزى عال العال
رغم كلامكو اللى بينقال
مش حيسيب الحكم محال
وان جه يوم فكر يتحال
حيورثكم لابنه جمــــال
by : dody
ليست هناك تعليقات:
إرسال تعليق